Sarriako Parketxea

Parketxe honen interpretazio-eremua leku egokia da Gorbeiako Parke Naturalaren kontserbazioaren garrantziari buruzko ideia orokor bat egin dezazun. Babestutako eremu horretan, natura oparoak bat egiten du kondairekin, artearekin, gastronomiarekin eta landa-inguruneetako tradizioekin.

 

Zentroan, grabatutako lokuzio baten bidez, parkeko paisaiaren, geologiaren, kulturaren eta bestelakoen ikuspegiak dakartzan ezaugarri garrantzitsuenak laburbiltzen dituen maketa bat dago, bai eta erakusketa autogidatu bat ere, non paisaian eta urtaroaren araberako animalia- eta giza-portaeran izandako aldaketak erakusten diren. Proiekzio-aretoan, are gehiago barnera zaitezke parkean, bideoen bidez.

 

Parketxetik, Gorbeia mendiaren gailurrera eramaten zaituzten hainbat ibilbide ateratzen dira, bai familian joateko ibilbide sinpleak, bai edertasun handiko ibilbide gogorragoak.

 

Parketxean publiko orokorrari irekitako jarduerak ere antolatzen dira, besteak beste, oreinen marrualdia behatzea. Irailean izaten da ikuskizun natural hori, eta talde txikietan antolatutako bisiten bidez ikus daiteke, aldez aurretik izena emanda.

 

Hurbil zaitez, halaber, informazio zehatza behar baduzu beste hainbat gairi buruz: ekipatutako guneak, aparkalekuak, bisita kulturalak, hezkuntza-programak, hipika, bizikleta, mendi-ibilaldiak eta Gorbeiara eta beste mendi batzuetara iristeko ibilbideak.